意甲攻略：拉素回勇客Ｗ冇甩拖

周五凌晨意甲快车继续开，拖连奴会喺主场迎战拉素，客队今季喺名帅沙利执教下表现不稳，但近期演出逐步改善，尤其王牌前锋恩莫比尼重拾射门鞋，今场作客「私房菜」拖连奴，有望重响胜鼓，客胜可期。

拉素早前联赛吞ＡＣ米兰2蛋后，喺欧霸杯又因门将犯错输畀加拉塔沙雷，不过上轮斗卡利亚里演出有明显改善，虽然只能够踢成2比2平手，但拉素全场控制战局兼有28次攻门，赢唔到波实在有啲唔够运，最重要系王牌射手恩莫比尼有波入，打破接近1个月入球荒，只要呢位金靴射手回勇，拉素入波就有保证。

拖连奴两大主力伤晒

相反主队拖连奴近期虽然2连胜，但意大利国脚前锋比洛迪仍养伤，上仗赢萨斯索罗更付出沉重代价，比利时中场发电机丹尼斯普拉特拉伤大腿筋，今场将会缺阵。翻查往绩，两队近4次碰头，拉素有3胜1和佳绩，「格食格」之下今仗梗系捧拉素客胜啦。